ЎЎЎ 1. Луіджыя Гігас. Пятрусь Сулкоўскі ды паўночна-ўсходняе ўзьбярэжжа Сыбіры. Ч. 1. Койданава. "Кальвіна". 2023.

Пятрусь Рыгоравіч Сулкоўскі – нар. у 1850 (па іншым зьвесткам у 1853) годзе ў Мінскай губэрні Расійскай імпэрыі, у сям’і дробнамаянтковых шляхціцаў.

У 1876 г. скончыў Усходні факультэт Санкт-Пецярбурскага унівэрсытэту ды распачаў службу ў Міністэрстве ўнутраных спраў.

У сакавіку 1880 г. атрымаў прызначэньне ў губэрнскае места Іркуцк перакладчыкам маньчжурскай мовы пры Галоўным кіраваньні Ўсходняй Сыбіры, да якой належала таксама і Якуцкая вобласьць.

У 1881 г. знаходзіўся ў працяглай камандзіроўцы на кліпэру “Стралок” з мэтаю агляду паўночна-ўсходніх берагоў Сыбіры ды Камандорскіх выспаў. У Іркуцк вярнуўся праз Кітай ды Манголію.

Ад 14 чэрвеня 1883 г. знаходзіўся на пасадзе старшага службоўца адмысловых даручэньняў пры генэрал-губэрнатару Ўсходняй Сыбіры Д. Г. Анучыну. У цэнтры ягонай ўвагі была праца па арганізацыі перасяленчага калянізацыйнага руху на Амур. Пры ягоным непасрэдным удзеле былі падрыхтаваныя да друку некалькі тамоў “Сборника главнейших официальных документов по управлению Восточной Сибирью”.

У траўні 1884 г. быў накіраваны ў Кяхту Траецкасаўскай акругі Забайкальскай вобласьці на пасаду памежнага камісару. Адзначым, што гандлёвая слабада Кяхта, праз якую ішоў гандаль з Кітаем, уяўляла сабой адзінае цэлае з акруговым местам Траецка-Саўск (Траецкасаўск) ды нярэдка звалася Кяхта-Траецкасаўск. У 1934 г. нарэшце Траецкасаўск ды Кяхта былі афіцыйна аб’яднаны ў адно места – Кяхту.

У Кяхце-Траецкасаўску актыўна ўдзельнічаў у грамадзкім жыцьці, абіраўся галосным у гарадзкую думу. Быў адным з заснавальнікаў мясцовай газэты “Байкал”, ад 1897 г. зьяўляўся яе цэнзарам ды апублікаваў на яе старонках дзесяткі артыкулаў і допісаў.

Памёр 9 (21) траўня 1903 года ды пахаваны паблізу афярніку Кяхцінскай царквы.

Быў узнагароджаны некалькімі расійскімі ордэнамі, румынскім крыжам ды кітайскім ордэнам Падвойнага Цмока II ступені.

Луіджыя Гігас,

Койданава